कठिन वातावरणका बीच नेपाल प्रहरी तथा सशस्त्र प्रहरीले गोली चलाएर भए पनि नियन्त्रणमा लिएको एक हजार तीन सय बोरा रासायनिक मललाई गौर भन्सार कार्यालयले आधाभन्दा कम मूल्यमा बेचेको घटनाको छानबिन अख्तियारबाट गराइने भएको छ ।
२० लाख दुई हजारभन्दा बढी मूल्यको रासायनिक मललाई भन्सारका नायब सुब्बा रेवती रोक्काले मिलेमतोमै बेचेको हो भनेर आलोचना र असन्तुष्टि बढेपछि रौतहटका प्रमुख जिल्ला अधिकारी धमेन्द्रकुमार मिश्रले लिलाम बढाबढका कागजपत्र झिकाएका छन्।
कागजपत्रहरूको प्रारम्भिक अध्ययन गर्दा त्रुटिपूर्ण देखिएकाले अनुसन्धानका लागि अख्तियार दुरूपयोग अनुसन्धान आयोगमा पठाइने प्रजिअ मिश्रले जानकारी गराएका छन्।
गौर भन्सार कार्यालयका कार्यालय प्रमुख बिदामा गएको मौका छोपी नासु रोक्काले नियम र प्रक्रिया मिच्दै लिलाम बढाबढमा भाग लिन चाहनेलाई रोक्दै आर्थिक चलखेलका आधारमा २० लाखभन्दा बढी मूल्यको मलखाद १० लाख दुई हजारमा बिक्री गरेका थिए।
गौर भन्सार कार्यालयका नासु रोक्काले आफूले मलखादको लिलाम बढाबढ पूर्ण रूपमा नियम र प्रक्रियाअनुसार नै गरेको बताएका छन्।
